Fituesi i zgjedhjeve të 6 tetorit, Albin Kurti, gjatë fushatës elektorale të tij, kishte premtuar votuesit e tij se Qeveria Kurti do të formohet pa Listën Serbe. Ai kishte deklaruar se qeveria e re do të formohej me serbet të cilët e pranojnë realitetin e Kosovës.

E për këtë kishte reaguar Nënkryetari i Listës Serbe Dalibor Jevtiq duke thënë se: “pa bisedime me Listën Serbe, e cila fitoi të gjitha 10 vendet me mandat serb, është e pamundur të formohet Qeveria e re e Kosovës.”

arbresh.info në lidhje me këtë çështje ka pyetur ekspertët e politikës, të cilët kanë mohuar pretendimet e Jevtiqit, duke thënë LVV dhe LDK, pasi që e përbëjnë shumicën e parlamentit, ministrat mund t’i emërojnë vetë.

Analisti politik Shkodran Ramadani, në një përgjigje të dhënë për arbresh.info, ka deklaruar se kushtetuta nuk e detyron qeverinë të emërojë ministra nga Lista Serbe.

“Legalisht, sipas kushtetutës është e lejueshme që të formohet qeveria pa Listën Serbe, sepse Kushtetuta thotë se 1 deri në 2 ministra duhet ti takojnë komunitetit serb, por nuk e specifikon që duhet ti takojë një force parlamentare. Ministrat emërohen pas konsultimeve parlamentare, që parashihen konsultime me Listën Serbe. Nëse konsultimet dështojnë, atëherë qeveria mund t’i emëroj ministrat me shumicën e votave“, deklaroi Ramadani, për arbresh.info

Ai më tutje ka thënë se nëse BE dhe SHBA, nuk bëjnë presion, Albin Kurti, e ka mundësinë që qeverinë e re ta formojë pa Listën Serbe.

“Politikisht Serbia do të insistoj që Lista Serbe të jetë pjesë e qeverisë, por një gjë e tillë mund të vendoset pasi që të marrim qëndrimin e ShBA-ve dhe BE-së. Nëse Amerika me Evropën insistojnë që Lista Serbe duhet të jetë në qeveri, atëherë, Kurti do ta ketë më vështirë. Por nëse nuk insistojnë, Albin Kurti e ka mundësinë t’a formojë qeverinë pa Listën Serbe dhe Kosova, nuk ka nevoje për listën Serbe për me e udhëheqë qeverinë”, tha Ramadani.

Një mendim të përafërt e kishte edhe analisti politik Faik Krasniqi, duke thënë se Qeveria s’ka nevoje për Listën Serbe.

“Deri më tash në çdo Qeveri serbet dhe minoritetet tjera kane qenë pjesë e Qeverisë. Nëse LVV dhe LDK dakordohen për krijimin e Qeverisë, atëherë nuk u nevojiten votat e serbeve por as te minoriteteve tjera, sepse do të përbenin shumicën e nevojshme. Albin Kurti ka thënë se do te bëjë koalicion me serbët që e njohin realitetin në Kosovë, por jo me listën serbe që është e ndikuar nga Beogradi. Kjo është mesë e drejtë. E kemi parë më qeveritë e kaluara se çfarë sjellje bënin deputetet e kësaj liste. Me muaj të tere largoheshin nga Kuvendi dhe Qeveria. Ata janë sabotuesit e shtetit te Kosovës, dhe Qeveria jonë s’ka nevoje për te tillë.”, u shpreh Krasniqi./A.Begolli/arbresh.info/